Aðstaða fyrir nemendur og skóla

myndir vefur

Aðstaða fyrir nám og skóla

Aðstaða Lýðskólans á Flateyri er á nokkrum stöðum í bænum.

Aðalhúsnæði skólans er á 2. hæð í gamla kaupfélaginu sem stendur við Hafnarstræti 11. Þar er vítt til veggja og útsýni til allra átta. Í húsnæðinu er frábær aðstaða til kennslu ásamt því sem þar er frábær aðstaða til þess að vinna og koma saman innan og utan skólatíma. Kennsla á brautinni Hugmyndir, heimurinn og þú fer aðallega fram í aðalhúsnæði skólans. 

Kennsla á brautinni Hafið, fjöllin og þú fer aðallega fram í Samkomuhúsi Flateyrar þegar okkur dettur í hug að vera innandyra. Í Samkomuhúsinu er fínasta aðstaða og nóg pláss svo að við getum dreift úr okkur og unnið bæði sitjandi, standandi og á hreyfingu.

Nemendur hafa aðgang að skólahúsnæði og félagsaðstöðu utan skólatíma hvort sem er fyrir verkefnavinnu, viðburði á vegum skólans, samveru eða fyrir annað sem tengist félagslífi.

Að síðustu má nefna að í tengslum við verknám og vettvangsferðir hefur fjöldi fyrirtækja og einstaklinga á Flateyri og í Önundarfirði boðið fram aðstöðu fyrir skólann, viðburði og félagsstarf. Bátar til sjósóknar, fiskvinnsla, eldhús, fjós og tún eru dæmi um slíka aðstöðu sem við komum til með að þurfa á að halda við kennslu og æfingar og þegar svo ber undir má gera ráð fyrir því að við munum koma saman á Kaffi sól, Bryggjukaffi, pítsuukvöldi á Gunnu kaffi og á Vagninum þegar vel liggur á okkur. Svo má ekki gleyma því að náttúran í Önundarfirði og nágrenni, hafið, fjöllin og landið verður kennslustofa okkar þegar svo ber undir.