Útihreysti, markmið og næring 1
Á námskeiðinu fá nemendur fræðslu um heilsu og tengsl líkama og sálar eins og þau birtast í heilsufari, áhrif streitu á líkamlega heilsu og hvernig hugarfar og atferli hefur áhrif á árangur. Fjallað verður um næringu, líkamsrækt og hugarrækt og hvernig best má búa líkama og huga undir áreynslu og átök.
Unnið verður með markmiðssetningu og ýmis þau tól sem nýtast vel þegar kemur að því að fylgja markmiðum sínum eftir. Leitað verður í smiðju íþróttafræði, næringarfræði, sálfræði og jóga.
Nemendur munu leggja stund á ýmsa líkamsrækt, jóga og hugleiðslu og setja sér markmið um þjálfun og ástundun til lengri tíma.
Salome Elín Ingólfsdóttir
næringarfræðingur og ÍAK einkaþjálfari
Fædd og uppalin á Ísafirði. Valdi íþróttabraut í menntaskóla og ákvað svo að velja næringarfræðina í háskólanáminu. Fannst frábært að geta frætt fólk um næringu og heilsu en þar sem næring og hreyfing eru svo tengdir þættir þegar kemur að heilsunni lá beinast við að bæta einkaþjálfaranámi við.
Helstu áhugamál Salóme eru heilsutengd og það vill svo skemmtilega til að vinnan er það líka. Fjölbreytt hreyfing og útivera auk þess sem matur fangar hugann á margan hátt. Sumrin eru nýtt í ferðalög með fjölskyldunni um Ísland og erlendis. Hornstrandir heilla mikið og þar hefur Salóme átt margar góðar stundir frá því að hún var barn.