Lokaverkefni

Lokaverkefni

Markmið námskeiðsins er að nemendur vinni verkefni sem samþættir og dregur saman þá þekkingu og reynslu sem þau hafa öðlast á námsárinu. Lögð verður áhersla á erindi hugmyndanna við samfélagið og tengingar við sjálfbærni.

 

Nemendur þróa hugmyndir sínar, finna þeim farveg í samfélaginu, setja upp sýningu á hátíðinni Aldrei fór ég suður og fara loks í lokaferð með pop-up útgáfu af sýningunni.

 

Lokaverkefnið hefst með formlegum hætti í námskeiðinu „Spegillinn“ og er síðan unnið undir handleiðslu kennara, með reglulegum fundum á vormánuðum (febrúar – maí). Í námskeiði um viðburðarstjórnun fullmóta nemendur sýninguna og hrinda í framkvæmd.

Hlín Helga er upplifunarhönnuður, sýningastjóri og ráðgjafi í Design Thinking hjá ráðgjafafyrirtækinu Capacent. Þar hefur hún starfað frá 2016 eftir að hafa verið sjálfstætt starfandi og gegnt kennarastöðum í háskólum víða um heim um árabil.  Á starfsferli sínum hefur Hlín sérhæft sig í samfélagslegri og notendamiðaðri hönnun, framtíðarrýni og þverfaglegri teymisvinnu. Hún gegndi stöðum við Meistaranám í Experience Design við Konstfack, University of Arts, Crafts and Design í Stokkhólmi og síðar við námsbrautina MA Design við Listaháskóla Íslands. Auk þess hefur Hlín sett upp og stýrt fjölda hugveita og sjálfstæðra námskeiða og sinnt stundakennslu við Stockholm School of Entrepreneurship, Parsons The New School í New York, Hong Kong Polytechnic University og National Institut of Design í Ahmedabad, Indlandi. Hlín Helga er gestakennari hjá Stockholm School of Entrepreneurship og fellow hjá hugveitunni W.I.R.E í Sviss sem ástundar þverfaglega framtíðarrýni. Hún hefur sett upp fjölda hönnunarsýninga og er listrænn stjórnandi ráðstefnunnar DesignTalks sem Hönnunarmiðstöð Íslands heldur ár hvert við upphaf HönnunarMars hátíðarinnar.