Upplifunarnám og hópastarf

Upplifunarnám og hópastarf

Að læra á því að gera og upplifa er mikilvægt tæki í allri hópavinnu og í gegnum verkefni og leik er hægt að draga fram mikinn lærdóm. Á þessu námskeiði skoðum við aðferðir upplifunarnáms og ævintýrameðferðar og hvernig við nýtum okkur þær í leik og starfi. Við kynnumst krafti hópsins, ólíkum hlutverkum innan hans og skoðum okkur sjálf í fjölbreyttum hlutverkum leiðbeinanda og stjórnanda. Við kynnum okkur mikilvægi starfs með börnum, unglingum og öldruðum á fjölbreyttum vettvangi tómstunda og áhrif þess á líðan og félagslega færni einstaklingsins. Farið verður ýtarlega í verkfæri af ýmsum toga og leiðir til að gera hópastarf aðgengilegt, lærdómsríkt og áhrifaríkt fyrir þátttakendur.

Unnið verður í smærri hópum og tækifæri gefst til að skipuleggja og leiða hópastarf með ólíkum aldurshópum íbúa í bænum.

Sigríður Eyþórsdóttir eða Sassa eins og hún er alltaf kölluð er með BS gráðu í iðjuþjálfun frá Bandaríkjunum og hefur síðustu 25 árin sérhæft sig í ævintýrameðferð og meðferðarvinnu með börnum og unglingum.

Hún starfar sem iðjuþjálfi í Hagaskóla en starfaði lengi á BUGL og á Reykjalundi. Sassa hefur víðtæka reynslu af kennslu og námskeiðshaldi fyrir börn og fullorðna og bjó í þrjú yndisleg ár í Valencia á Spáni.

Í frítíma sínum elskar Sassa að halda matarboð, syngja í kór og dansa með vinkonum sínum og ferðast eins oft og tækifæri gefst.